საქართველოში დიპლომატიური უფლებამოსილების ვადის ამოწურვასთან დაკავშირებით, კულტურული მემკვიდრეობის დაცვის ეროვნულმა სააგენტომ და ხელოვნების საერთაშორისო ცენტრმა გელათის სამონასტრო კომპლექსში აშშ-ს სრულუფლებიან და საგანგებო ელჩს იან კელის გაცილების საზეიმო ცერემონიალი მოაწყო. კულტურული მემკვიდრეობის ძეგლების დაცვისა და მოვლა პატრონობის საქმეში გაწეული დიდი წვლილისთვის ელჩს სამახსოვრო საჩუქრები სააგენტოს გენერალურმა დირექტორმა ნიკოლოზ ანთიძემ და ხელოვნების საერთაშორისო ცენტრის დირექტორმა მაკა დვალიშვილმა გადასცა. ელჩის გაცილების საზეიმო ცერემონიისთვის გელათის სამონასტრო კომპლექსი ორგანიზატორების მიერ სიმბოლურად შეირჩა. სწორედ იან კელის უშუალო თანადგომითა და მონაწილეობით დაფინანსდა აშშ კულტურული მემკვიდრეობის დაცვის ფონდის მიერ გელათის ღვითისმშობლის ტაძრის უმნიშვნელოვანესი სარეაბილიტაციო პროექტები: 1. 2016 - 2018 წლების პროექტის ფარგლებში განხორციელდა ღვთისმშობლის ტაძრის საპირე წყობის დაზიანებული ქვების სეგმენტების რეკონსტრუქცია, ფრაგმენტირებული ადგილების გაერთიანება, მიკრობზარებისა და ბზარების კონსოლიდაცია და სხვა საკონსერვაციო და აღდგენითი სამუშაოები. 2. გელათის ღვთისმშობლის ტაძრის გუმბათის მოხატულობის დიაგნოსტიკური კვლევისა და კონსერვაციის პროექტის ფარგლებში 2014-2015 წლებში ჩატარებული კვლევების საფუძველზე მოხდა ტაძრის ფრესკების გადაუდებელი კონსერვაცია, მოიხსნა მოხატულობის ბათქაშისა და ფერწერული ფენის დაზიანებები . 3. გელათის ღვთისმშობლის ტაძრის არქიტექტურული რეაბილიტაციის 2013 - 2018 წლების პროექტის ფარგლებში, საქართველოს კულტურული მემკვიდრეობის ეროვნული სააგენტოს და ააიპ "საქართველოს მემკვიდრეობის" მიერ შემუშავებული განვითარების გეგმის მიხედვით კონსტრუქციულად გამაგრდა ღვთისმშობლის ტაძრის გუმბათი. რეაბილიტაცია ჩაუტარდა ტაძრის ტრომპებს, მკლავებს, მკლავთაშორის გადახურვებს, და აღმოსავლეთ ფასადის სახურავს, რაც ძველი თუნუქის გადახურვის არქეოლოგიური აღმოჩენების მიხედვით აღდგენილი ახალი მოჭიქული კრამიტით შეცვლას ივალისწინებდა. 4. აშშ ელჩის კულტურული მემკვიდრეობის დაცვის ფონდის დაფინანსებითვე, 2003- 2004 წლებში ხელოვნების საერთაშორისო ცენტრის მიერ განხორციელდა გელათის მონასტრის ღვთისმშობლის ტაძრის ნართექსისა და ეგვტერების ფრესკების (XII-XVIII სს.) დიაგნოსტიკური კვლევისა და პირველი რიგის საკონსერვაციო სამუშაოების პროექტი, რომლის ფარგლებშიც ჩატარდა გელათის მონასტრის ტერიტორიის გეოლოგიური კვლევა, ღვთისმშობლის ტაძრის კლიმატოლოგიური და არქიტექტურული შესწავლა, ნართექსისა და ეგვტერების ფრესკების დიაგნოსტიკური კვლევა. 5. 2013-2014 წლებში ხელოვნების საერთაშორისო ცენტრმა შეასრულა გელათის ღვთისშობლის ტაძრის წმ. მარინეს ეკვდერის და სამხრეთ კარიბჭის ფრესკების გადაუდებელი კონსერვაცია. მოხდა მოხატულობის ბათქაშისა და ფერწერული ფენის დაზიანებების გაწმენდა. სამუშაოების წინ ჩატარდა არქიტექტურის გადაუდებელი სარეაბილიტაციო სამუშაოები. აშშ -ს საელჩოს კულტურული მემკვიდრეობის დაცვის ფონდის მიერ დაფინანსებული პრექტები განხორციელდა ხელოვნების საერთაშორისო ცენტრის მიერ, ააიპ. « საქართველოს მემკვიდრეობასთან», თბილისის სახელმწიფო სამხარტვრო აკადემიასთან და "იკორთა2007"-თან თანამშრომლობით. აშშ - სახელმწიფო სახსრებითვე საქართველოს კულტურული მემკვიდრეობის ძეგლების სხვა სარეაბილიტაციო პროექტებიც დაფინანსდა, რომელთაგან ერთ-ერთი გამორჩეულია  არმაზციხის (ბაგინეთის) არქეოლოგიური კომპლექსის არქეოლოგიური კვლევისა და კონსერვაციის სამუშაოები. ამერიკული მხარის დონორობითვე განხორციელდა ატენის სიონის სუბსტრუქციის გამაგრებითი სამუშაოები. აშშ -ს საელჩოს კულტურული მემკვიდრეობის დაცვის ფონდის დაფინანსებით წარიმართა ტიმოთესუბნის ტაძრის კედლის მხატვრობის სარესტავრაციო პროცესიც.. ამერიკული მხარის ფინანსური თანადგომით შედგა ზუგდიდის ბოტანიკური ბაღის რეაბილიტაციის პროექტის მომზადების ეტაპიც.