ყოველწლიურ კონკურსზე “წლის საუკეთესო ოსტატი” 26 თებერვალს, საქართველოს პარლამენტის ეროვნული ბიბლიოთეკის შენობაში ტრადიციული რეწვის სფეროში ჩართული საუკეთესო ახალგაზრდა შეგირდები გამოვლინდნენ. ტრადიციული რეწვის ასოციაციის ორგანიზებითა და საქართველოს კულტურული მემკვიდრეობის დაცვის ეროვნული სააგენტოს მხარდაჭერით წარმართულ ღონისძიებაზე სპეციალურ ნომინაციაზე წარდგენილი კონკურსანტებიდან 3 გამარჯვებული შეირჩა, რომელთაც არამატერიალური კულტურული მემკვიდრეობის სხვადასხვა დარგის სიცოცხლისუნარიანობის შენარჩუნებაში შეტანილი მნიშვნელოვანი წვლილისთვის ფულადი პრემიები გადაეცათ. პირველი პრიზი, 700 ლარიანი ფულადი ჯილდოთი ფარდაგების ქსოვის რეწვის ოსტატ-შეგირდს ნინო იაკობიშვილს ერგო. მეორე პრიზი და 400 ლარიანი პრემია ხეზე კვეთის ოსტატ-შეგირდს მარიამ მელთაურს გადაეცა. მესამე პრიზი კი 200 ლარიანი ფულადი ჯილდოთი მიხეილ მარიამიძეს შეხვდა. პარალელურად, საქართველოს კულტურული მემკვიდრეობის დაცვის ეროვნულმა სააგენტომ წიგნის მაღაზიათა ქსელი „ბიბლუსის“ 100 ლარიანი ვაუჩერებით დააჯილდოვა კონკურსის ორი მონაწილე - თეკლა გურგენიძე და ეკატერინე ადუაშვილი. კონკურსს, რომელმაც წელს ქვეყანაში მოღვაწე ხალხური რეწვის ათეულობით სახელოსნოს მოუყარა თავი, საფუძველი 2015 წელს ჩაეყარა. მის მიზანს კი ტრადიციული რეწვის სფეროში მოღვაწე ოსტატი-პედაგოგების ღვაწლის საზოგადოებისთვის გაცნობა და ახალგაზრდა ოსტატი-შეგირდების წახალისება წარმოადგენს