საქართველოს კულტურული მემკვიდრეობის დაცვის ეროვნული სააგენტოს დაფინანსებით ააიპ „არქეოლოგია და კონსერვაციამ“ და ნოქალაქევის საერთაშორისო არქეოლოგიურმა ექსპედიციამ ზუგდიდის რაიონის სოფ. ჯიხაშკარში მდებარე ჭაქვინჯის ციხის ციტადელში 2019 წლის 9 ივნისიდან 16 ივნისის ჩათვლით არქეოლოგიური დაზვერვითი სამუშაოები აწარმოა. ციხეზე არქეოლოგიური გათხრების შედეგად ციხის ციტადელის შიდა ეზოში გაიჭრა სამი თხრილი . მათი გახსნის მიზანი 1967-68 წლებში აკადემიკოს პარმენ ზაქარაიას ხელმძღვანელობით ჩატარებული არქეოლოგიური გათხრებისას გამოვლენილი კულტურული ფენებისა და სტრატიგრაფიის გადამოწმება იყო. აღსანიშნავია რომ არქეოლოგიური სამუშაოები ჩატარდა დასავლეთ ევროპაში არსებული სტანდარტებისა და მეთოდიკების დაცვით. კერძოდ, ბრიტანეთში აპრობირებული მეთოდიკის გამოყენებით. აღნიშნული მეთოდიკა გულისხმობს გამოვლენილი არქეოლოგიური ფენებისა და არტეფაქტების ცალკეული კონტექსტების პრინციპით რეგისტრაციას და სტარტიგრაფიული თარგის შემუშავებას. ასევე, გათხრების პროცესის აღსანუსხად გამოყენებული იქნა საველე სარეგისტრაციო ბლანკები და დღიურები. მუშაობა იწარმა პრეპარაციის პრინციპით, მცირე ზომის წერაქვების, ქაფჩებისა და ფუნჯების გამოყენებით. თითოეული ფენისა და მნიშვნელოვანი არტეფაქტის მდებარეობა განისაზღვრა თხრილებში არსებული კვადრატული ბადით. სიმაღლეები დადგინდა ნიველირის გამოყენებით. ექსპედიციას ხელმძღვანელობდა არქეოლოგიის დოქტორი ნიკოლოზ მურღულია.