მცხეთა-მთიანეთის სამხარეო ერთეულში, დუშეთის მუნიციპალიტეტში, სოფელი ებნისში მდებარე წმ. გიორგის სახელობის ეკლესიას 2018 წლის 3 აგვისტოს საქართველოს კულტურული მემკვიდრეობის დაცვის ეროვნული სააგენტოს დირექტორის ნიკოლოზ ანთიძის შესაბამისი ბრძანებით კულტურული მემკვიდრეობის უძრავი ძეგლის სტატუსი მიენიჭა. ეკლესია დარბაზულია (13,2×8 მ). ნაგებია რიყის ქვითა და აგურის სწორხაზოვანი წყობით. აგური გამოყენებულია კუთხეებში, კარ-სარკმელთა ღიობებში და ფასადების მორთულობაში. შენობის აღმოსავლეთ ნახევარი რიყის ქვის ცოკოლზე დგას. შესასვლელი კარი გაჭრილია როგორც დასავლეთით, ასევე სამხრეთით. დასავლეთის კარი გარედან შეისრულთაღოვანია, სამხრეთისა კი ნახევარწრიული თაღითაა გადახურული. შიგნიდან ორივე კარი თარაზულადაა დასრულებული. აღმოსავლეთისა და დასავლეთის კედლებში თითო, ხოლო ჩრდილოეთისა და სამხრეთის კედლებში ორ-ორი თაღოვანი სარკმელია განთავსებული. ტაძარი დასრულებულია აგურის ლავგარდანით. გადახურულია თუნუქის ფურცლებით. სამხრეთ კედელი დანაწევრებულია კედლის დონიდან ჩაწეული ოთხი სწორკუთხა მოცულობით, რომლებიც ერთმანეთისაგან გამოყოფილია აგურის პილასტრებით. ასეთ სწორკუთხედშია მოქცეული კარი , რომლის ზედა ნაწილშიც სახატე ნიშაა ამოყვანილი. დასავლეთ კედელზე სარკმლის გარშემო სამი ჩაღრმავებული კვარცხლბეკზე მდგარი ჯვარია გამოსახული, ხოლო აღმოსავლეთით-ერთი. ნახევარწრიული აფსიდა დარბაზისაგან გამოყოფილია იმპოსტით დასრულებული პილასტრებით, რომლებზეც საბჯენი თაღია დაყრდნობილი. აფსიდის ღერძზე თაღოვანი სარკმელია, მის ორივე მხარეს კი სხვადასხვა ზომის თაღოვანი ნიშია გაჭრილი. მარჯვენა ნიშა მარცხენასთან შედარებით მოზრდილია. დარბაზის გრძივი კედლები დანაწევრებულია პილასტრების ორი წყვილითა და ორსაფეხურიან იმპოსტებზე დაყრდნობილი თაღებით. თითო ნახევარპილასტრია დასავლეთ კედლის ორივე კუთხეში, რომლებზეც დასავლეთ კედლის მიმდებარე საბჯენი თაღია დაყდნობილი. სწორკუთხა ფორმის ნიშებია გაჭრილი გრძივი კედლების აღმოსავლეთ ნაწილში. ტაძრის ინტერიერი შელესილი და შეთეთრებულია, ადგილ-ადგილ შელესილობა ჩამოშლილია, საიდანაც ჩანს, რომ კონქი, პილასტრები და თაღები აგურითაა ამოყვანილი. ეკლესიას აქვს ძეგლის შემდეგი მახასიათებლები: სიძველე, არქიტექტურული ფორმა, ფასადთა მორთულობა.