ახმეტის მუნიციპალიტეტის, სოფელ არგოხში მდებარე XVI საუკუნის კოშკი-სამლოცველო სამებას 2018 წლის 24 ივლისს საქართველოს კულტურული მემკვიდრეობის დაცვის ეროვნული სააგენტოს დირექტორის ნიკოლოზ ანთიძის შესაბამისი ბრძანებით კულტურული მემკვიდრეობის უძრავი ძეგლის სტატუსი მიენიჭა. კოშკი სწორკუთხაა (3,5×3,5 მ), ნაგებია ნატეხი და რიყის ქვით დუღაბზე, დასრულებულია კონუსური გადახურვით. ალაგ-ალაგ შემორჩენილია ბათქაშის კვალი. ორსართულიანია. პირველი სართული სამლოცველოა. შესასვლელი სამხრეთი კედლის დასავლეთ კიდეშია. კარი სწორკუთხაა, ნაოთხალიანი. შიგნიდან კარის წირთხლზე საურდულე ფოსოა. სამლოცველო აღმოსავლეთით დასრულებულია ნახევარწრიული აბსიდით, რომელიც დარბაზისგან მხრებითაა გამოყოფილი. აბსიდის ღერძზე სწორკუთხა სარკმელია, ხოლო მის ორივე მხარეს სწორკუთხა ნიში. ასეთივე ნიში ჩრდილოეთის ნიშის ქვეშ, იატაკის პირზეცაა. სარკმლის ქვეშ ტრაპეზია მიდგმული. აბსიდა კონქითაა დასრულებული, რომლის სატრიუმფო თაღი მხრებს ეყრდნობა. კედლები მობათქაშებულია. მეორე სართულზე შესასვლელი აღმოსავლეთ კედელშია. კარი არქიტრავულია და ნაოთხალიანი. ჩრდილოეთ კედელში ერთი ნიშია. ოთახი გადახურულია კამარით. კედლები მობათქაშებული ყოფილა. კოშკი ძალიან საინტერესო ნაგებობაა, როგორც თავისი ფუნქციური მახასიათებლებით (სამლოცველო, სათავდაცვო), ისე არქიტექტურული ფორმითა და დეტალებით (აბსიდა, კარები, კონუსური გადახურვა).