ახალქალაქის მუნიციპალიტეტის სოფელ მაჭატიაში მდებარე X ს-ის ეკლესიას 2018 წლის 18 აპრილს საქართველოს კულტურული მემკვიდრეობის დაცვის ეროვნული სააგენტოს დირექტორის ნიკოლოზ ანთიძის შესაბამისი ბრძანებით კულტურული მემკვიდრეობის უძრავი ძეგლის სტატუსი მიენიჭა. ეკლესია დარბაზულია, სამხრეთის თანადროული მინაშენით. აგებულია X საუკუნეში გადაკეთებულია XIX საუკუნეში.აშენებულია დამუშავებული კვადრებით. შესასვლელი სამხრეთიდან აქვს. მთავარი დარბაზის აღმოსავლეთის და დასავლეთის კედლებში თითო სარკმელია გაჭრილი, ასევე თითო სარკმელი აქვს მინაშენის აღმოსავლეთისა და სამხრეთის კედლებში. დარბაზი აღმოსავლეთით ნახევარწრიული აბსიდით სრულდება. მისი თაღოვანი გადახურვა მხრებზე გადასულ თაღს ეყრდნობა. საკურთხევლის იატაკი ამაღლებულია. აბსიდის ღერძზე გაჭრილი, გარეთკენ შევიწროვებული სარკმლის ქვეშ ქვის ტრაპეზი დგას. საკურთხევლის ჩრდილოეთის და სამხრეთის კედლებში თითო სწორკუთხა ნიშია. დარბაზის კამარა სამხრეთის და ჩრდილოეთის კედლებზე გაკეთებულ წყვილ პილასტრზე გადასულ თაღს ეყრდნობა. დარბაზს გარშემო საფეხული შემოსდევს. სამხრეთის მინაშენს აღმოსავლეთით ნახევარწრიული აბსიდი აქვს, რომლის ღერძზე გარეთკენ შევიწროვებული სარკმელია გაჭრილი. აბსიდა მოგვიანებით ამოშენებულია სარკმლის დონეზე. აბსიდას თაღოვანი გადახურვა აქვს. მინაშენის დარბაზის გადახურვა ცალფერდაა. მინაშენის ჩრდ. კედლის ძირს საფეხური გასდევს. ტაძარი გადახურული იყო ლორფინით. ტაძრის მორთულობას წარმოადგენს დასავლეთის სარკმლის თავი ნახევარწრიული შუბლით, მინაშენის სამხრეთ კედელში ჩაშენებული სარკმლის თავი, რომელიც ოთხკუთხა გრეხილ ჩარჩოში ჩასმული კვარცხლბეკზე აღმართული ჯვრის რელიეფითაა გაფორმებული (მეორადი გამოყენებისაა, რადგან სარკმელი მხოლოდ ამ ქვის ჭრილია და ქვემოთ არ გრძელდება) და ამავე კედელში ჩასმული მზის საათი ქართული ასომთავრული ასოებით, რომელიც ასევე მეორადი გამოყენებით, თავდაყირაა აქ ჩასმული. ტაძარს ჩრდილოეთიდან მიდგმული აქვს ნატეხი ქვით ნაგები ნაგებობა, რომელსაც ჩრდილოეთისკენ ნახევარწრიული შვერილი აქვს. ნაგებობა ერთი მეტრის სიმაღლეზეა დანგრეული და მისი ფუნქციის გარკვევა ჭირს. მის კედლებში სხვადასხვა არქიტექტურული დეტალებია ჩატანებული. ტაძარს დანარჩენი მხრიდან გვიან აგებული ქვის გალავანი აქვს. ეკლესია გადაკეთებულია, დადაბლებულია. ინტერიერი შელესილი, რის დროსაც დაიკარგა ძეგლის არქიტექტურული დეტალები, მინაშენის აბსიდა ამოშენებული, დაგებულია ახალი იატაკი. არ აქვს ლორფინის სახურავი. მის ნაცვლად ბალახის საფარია ამოსული.