საქართველოს კულტურული მემკვიდრეობის დაცვის ეროვნულ სააგენტო აგვისტოს თვიდან ფიტარეთის ღვთისმშობლის სახელობის ეკლესიის მცირე სარეაბილიტაციო სამუშაოებს ახორციელებს, რომელიც ტაძრის ლორფინის სახურავის ნაწილის რეაბილიტაციას გულისხმობს. სამუშაოები საკურთხევლის სახურავის კაპიტალური შეკეთებას მოიცავს. გადახურვის კონსტრუქციის ეს სეგმენტი იმ კრიტიკულ ნაწილს წარმოადგენს, საიდანაც ტაძრის ინტერიერში ნალექი ჩაედინებოდა და კედლის მხატვრობა ზიანდებოდა. საკურთხევლის ორფერდიან სახურავზე ჩატარებული რეაბილიტაციის შედეგად, ადგილზე მოეწყობა მთლიანად ახალი ლორფინის სახურავი, რომელიც ატმოსფერული ნალექებისაგან ტაძრის გრძელვადიანი დაცვის გარანტია იქნება. მიუხედავად იმისა, რომ ფიტარეთის ეკლესიის პირველი ეტაპის სარეაბილიატციო სამუშაოები საკურთხევლის გადახურვასთან ერთად, ჩრდილოეთ ნავის ორფერდა სახურავის კაპიტალური შეკეთებასაც მოიცავდა, სარეაბილიტაციო პროცესის დროს გამოვლენილმა ნაკლოვანებებმა მისი კაპიტალური აღდგენის შესაძლებლობა მომავალი წლისთვის გადაავადა. ხარვეზები კი გასული საუკუნის 70 იან წლებში ფიტარეთის ეკლესიაზე ჩატარებული რეაბილიტაციის დროს დაშვებული შეცდომებს უკავშირდება. აღმოჩნდა, რომ ტაძრის სახურავის არსებული ქვის ბურული მხოლოდ იმიტაციაა ლორფინის, რადგან ქვის ფილებს არ გააჩნია ლორფინის სახურავისთვის დამახასიათებელი წყლის ამრიდებელი წიბოები, ხოლო სახურავის ლილვებს კი ჩამკეტის ფუნქცია. ისინი მხოლოდ დუღაბის ხსნარით იყვნენ დაწებებული, რაც ტაძარში წყლის შეუფერხებელ ჩადინებას იწვევდა. ამავდროულად, გამოვლინდა გადახურვის მზიდი კონსტრუქციის არასახარბიელო მდგომარეობაც. ის ძლიერ არის დაშლილი და მნიშვნელოვანი ზომის ბზარები არენიშნება. არქიტექტორ-რესტავრატორების დასკვნის მიხედვით, გადახურვის მზიდი კონსტრუქცია, რომელიც თაღოვანი არაა და დაყრდნობილია საკურთხევლის თაღზე დაშენებულ 4 სვეტზე, გამაგრებას საჭიროებს. ჩრდილოეთ ნავის დაზიანებულ ორფერდა სახურავს რესტავრატორები დროებითი ჰიდროსაიზოლაციო საშუალებებით დაიცავენ, რაც ფიტარეთის სრულმასშტაბიანი რეაბილიტაციის პროექტამდე ტაძარს ნალექებისაგან დაიცავს. ფიტარეთის ეკლესიის სახურავის სრული სარეაბილიტაციო სამუშაოები 2018 წლის გაზაფხულიდან დაიწყება და მომდევნო წლის ბოლომდე დასრულდება. ამ სამუშაოების განხორციელების შემდეგ კულტურული მემკვიდრეობის დაცვის ეროვნულ სააგენტო მე-13 ეკლესიის კედლის მხატვრობის კონსერვაციის პროცესის დაწყებასაც გეგმავს, რომელშიც თბილისის სამხატვრო აკადემიის კონსერვატორ-რესტავრატორების ჯგუფი ჩაერთვება. ამჟამად სააგენტოში მხატვრობის კონსერვაციის პროექტს ამზადებს. მისი განხორციელების ვადად კი სავარაუდოდ 2019 წელი განისაზღვრება